Paletwa

CHIN RAM HUMHIM CU CHIN MI HMUAHHMUAH ȚUANVO A SI.

🎯An HLAWHSAM.

CNA/F party dintu Pu Țial Khal le a rualpi pawlin an vission hmuitin lungput cu, anhmai lam anhmuh ban lo mi can ih Chinram Chin mipi  pawl, mahte ukawknak zalennak kan mah kan kutsung roriah a um ve thei nak ding hrangah, mawhphurhnak neitu an si ve a si, ti thei aw in, cui țuanvo cu țuansuah thei tumtahin atakin țuan  an rak thawk, ziang tiang anthleng ti mi cu theih dan pawm dan a bang aw lo ding. 

🎯A RAH A HMIN LO

Lungrual thei loh a poizia cu a rah kan seng rero, kan ram bite Ar hmaitia te tuisun ni le canah kan mitin kan hmuh cingin a kil le a tlangah beuh a tuar ih mi kutah a lut cuahco. Cu ti laiah a sung le a tual ih țo a fahniang pawl cu anmah le anmah remawk lo le do awk nakah an tik cu can an ziandawng tiang an rak cemtir re ro men.

🎯A HRIK KAN HAWL

Mi țhenkhat pawl cu anlungdi a rak riam curco sawn tla a bang, manhla tukah an ruat sawn riangri tla abang. Kum 2021 July 26 lai ah khan Assam le Mizoram ramri thuih an rak buai țumah khan, Mizo ram țhalai nonawn mipi pawlcun pumkhat, lungkhat ten luang tlangin, khai anbuai nak ankhua le anram humhimnak cu an mawhphurh nak a si ti an theithiam ciau ih, an pawm thiam,  puhmawh ding dang dapkual ciamco lo in an suak khawmih anmah ai-ih a let ziang maw ti zah hnakih tam le caksawn Assam pawl kha anduai tir rupri mei.

🎯KEI THAWN A SAI LO PAM.

Kan lalram sungah a um lo ding a si ceng le mangah cun, kan hmuan ram cu mikutsungah a thlen poi kan ti lo. Ram tuah țhat kan tum, a si nan a hlawhtlin thei lo nak a hrampi cu a sung a nget, a sungih um la-la lakah do dalawk nak a phun phunih naksik awknak, phiar awk, hek awk nak, thang siat awk nak politics thlisia pawl hmuhding tuisun ni tiang a tam, Chin miphun si vek si lo dawk vek pawl hmuh ding an tam, Jerusalem kulhsia, 5th century 464-424BC Persian King Artaxerxes san lai ih Israel pasal țha Nehemiah cun( 444BC ni 52) , Jerusalem kulhcim tuah țhat tumin nasaten țan a lak lai ah khan Sanballat le Tobiah, Arabia mi pawl, Ammon le Ashdod pawl khan anthik kan ti ding maw, nasa ten an do dal a thih nak ding tiang thang an rak kam, cu bang mi nung pawl kha Chinram khalah hin lungrual nak ti hnawktu, ral lam țangthup, Chinram a țhat taktak phang nan rak um ve ih, nan mah le nanmah pawl cu ralah nan tuah awkih, nanram a lo beuhhek sak rero tu pawlsawn cu nan hero bangah nan ruat riangri ih cu pawl cu nan u le nau vekah nan hei cohlang.  lala fawn. 

🎯ȚAN LAM NA NANA CU THA KAN PE NA THEI NASA.

Ziang hrangah hriam kan kai? Kan Meithal pawl hi funghreu kianghrol bangih hum hruahhri le ken men men sawh dingah a si lo pi. Nan fiang a si len, Paletwa cu nan ram a si ve lo maw? Nannih cu nan kianghrol kaih mi thawn a pehpar aw ve lo bangah nan ruat cuh teh, Khi mi kan ram runsuak leh sal tu dingah, Kaakua pdf le, Kaakua cdf lawngin mawhphurhnak an nei lo pi, nangmah rori tla kha. Paletwa khi kaakua pdf ta lawng a ai lo, Kaakua cdf ta lawng a si fawn lo, Chin a ai mi hmuahhmuah ih ram a si.

🎯CHAWL THLANGUH LA LAMZIN HAWL UH.

Mipi hmai ah fel sawn țha sawn si a thu le thli men lawngih hmaifai zuamawk bangsan thlanguh, taktak tei ti ah cun mipi pawlin ziangmi colour underwear nan hruk ti tiang kan lo thei țheh thlang ko, țhaten khua ruatuh a takih remdaihnak hmuh kan duh, bukhat hnualah nan leng tlang thei lo a si tlalen united zawng tlain ke kar tlan a theih ko. Tuvekzin hi cun nan tefa sin san deng tiang khalah Chinram hi a eng dah lo ding, Paletwa tla mai ram si ve lo bangin mi kutsungah a lut cu lungawi diriam zet sawn bangin nanhei au kiau ciamco thei, 

PATHIAN IN KAN CHIN RAM DAMTIR HRAMSEH