tttuuu

DECEMBER THLA KAN THLEN TINTEN SERMON TU PAWLIH THUPI PAKHAT A SI MI TUU KHAL PAWL THU HLA.

Khrismas thla December kan thlen tin ten kohhran ah thuthang țha simtu pawlin inhlawm tambik mi thupi pakhat cu Tuu khal pawl thuhla hi a si. Tuu khal pawl thuhla rel tel lo cun Khrismas hi a kim thei lo tluk a si. Tuu khal pawl thuhla hi Khrismas ti Khrismas tu pakhat a si ve, ti seh la, a sual tam lo ding.

1. TUU LE A KHALTU THU HLA.

Bibleah tuu le a khaltu thuhla hi a langtam zet, Bibleah tuu khal hna a rak țuan hmaisa biktu le, ranvulhih ei-in a rak hawl hmaisabik tu kan hmuh mi cu Adam ih fapa nauta sawn Abel kha a si , ( Gen 4:2) Cuih hnuah a naupa Abel a hringsal. Abel cu tuukhal a si ih Kain cu lothlo a si.

Bible ah Tuu (Sheep) ti mi hi Thlunghlunah  vawi 152, Thlungtharah vawi 41 a lang. Cun Tuu khaltu ti hi Thlunghlunah ah vawi sawmruk pakhat (61) leh Thlungtharah vawi hlei sarih(17) a lang.

Zesu cibai buktu tuu khal pawl thuhla Luke in a ngan dan cu, 👇👇👇
Luke 2:8-14👉Cutawk ram sungah cun tuukhal ṭhenkhat pawl cu zan ah an tuu pawl kil in an um. Bawipa ih vancungmi pakhat cu an hnenah a lang ih Bawipa ih sunlawinak cu an parah a rung tleu. An ṭih ngaingai; asinain vancungmi cun, “Ṭih hlah uh! Nan hrangah thuthangṭha ka run keng; cuih thuthangṭha cu mi hmuahhmuah hrangah lungawinak ngaingai a si. Tuih zan rori ah David khuasung ah nanmah Runtu Bawi Khrih a suak zo. Cumi hminsinnak ah hitiin a si ding: Naute cu puan in an tuam dingih caw rawl einak kuang sungah an hlum nan hmu ding,” tiah a ti.
Hmakhat teah cuih vancungmi thawn hmunkhat ah vancung ihsin vancungmi burpi an rung lang ih Pathian thangṭhatnak hla an sak.
“A sang bik van ahkhin
Pathian cu thangṭhat si ko seh;
A duhdawtmi minung pawl umnak
leilung ahhin remnak
leeng ko seh,” tiah an ti.
LUKA 2:8-14
👆 ti in.

Cutawk ram sungah cun tuukhal ṭhenkhat pawl cu zan ah an tuu pawl kil in an um,  👉Cutawk ramsungah”  ti mi hi mirang Bible  ah cun region ti a si, a umzia cu, tuu khal pawlin an tuu runrual pawl an khalhnak hmun le ram a sim nak hmunkha a si ih, cui hmun le ram cu Bethlehem thawi hla tuk lo Bethlehem kiangkap hramlak hmun pakhat, neitu bik um lo, ram palaileng, lentlang, buannel, ti vek phun khi a si ih, cu mi ram or hmun cu Tuu rual ranrual zokhalin antlanlen tir theinak hmun ram a si.

2. TUU KHALH LEH ISRAEL HRING NUN

Tuu khalh ti mi hi Israel pawlhrangah cun thilthar a si lem lo, Anpi pu anthlah tu pawl kan zoh a si le, Jacob+Israel ihsin thawkin (Abraham ihsi khalin)  Tuukhalh ih pumcawm aw, ranvulh ih khawsa an rak si hrimhrim, David khal a nau hak lai ihsin Tuu khal ih rak khawsa a si. (1Samuel  17:34-36)

3. MI MAN TUK PAWL HNAKIN , MI MAN LO, HNA NGAH TUK PAWL HI PATHIAN IN A HNA ȚUAN DINGAH A KO DUH CUANG .

Tuu khal hna hi hnasang le hna zahum a si lem lo. Tuu khal hna țuan ding hin cathiam sang si leh degree neih kher- kher khal a țul fawn lo. Tuu khalh hna hi Zirsang lo, thiam nak nei lemlo pawl ih țuan țheu mi hna a si. Tu laisan khal ah hin, cathiam le mifim pawl hi tuu khal cawkhal keel khal kan hmuh dah lem lo, cathiam le mifim deuh pawl cu ka pu ka pu ti țulin office lamah officer an si deuh tlangpi. Ramhruai tu mifim cathiam tuu khal hruihhro hmuh ding an vang  .  Tuu khal ding hin, cathiam, zirsang mi si a țul lo nasa a si bik.

Naute Zesu a suah zo thu Vantirhkoh pawlin an rak phuansuah le theih tir mi pawl, Naute Zesu cibai buk hmaisa bik tu, Zesu pian ni lawm hmaisa tu pawl hi hnasang țuan le zirsang pawl an rak si lo, mi țuan paih lo , țuan duh lo țuantu Tuu khal pawl an rak si cu teh, 

Tuu khal pawl hnenih sin, nau piang sunglawi Jesu cibai buk dingah milian mifarah kan um lo, hna niam bik țuantu le mi farah mi zonzai, mi niam bik te tiangin mi zo khalin Zesuh hi cibai kan buk thei țheh a si, ti hi kan zir suak thei a si.

Cun Zesu hi mi man ngaingai mi awlthawng ngai ngai pawl hnenah hin a puansuak aw lem lo, cu pawl khi a ko kan hmu lem fawn lo, Tuu khal pawl khal, zianghman ti lo le zaangzel takih an um hruahhri lai canah si loin, tuu khalih anbuai vutvo lai can, cinghnia le sihal, tuu rualpawl deh theitu pawl lakah kilhim hna țuan in an tuu pawl hrang pumpe aw in, an riahcilh an buai vutvo lai can ah, cu ti vekih tuu hrangah pumpe aw in tikcu can anhman lai canah si an hnenah thuthang țha a thlen.

4. THUAWIH NUN

Le, Tuu khal pawl nun ih kan hmuh leh mi cu, thuawih nun hi a si, van tirhkoh in an sim bangin thu awih takin, rinhlelh nak tel lo in A pian nak lam panin cibai buk dingin an tuu rual pawl fehsan in Lal piang Zesu cibai buk dingin an feh. Bible cun hi tin a ngan Luke 2:16-18 Cuticun manhlap zet in an feh ih Mari le Josef le caw rawl einak kuang sungih a itmi naute cu an va hmu. Tuukhal pawl in naute an hmuh tikah vancungmi in cuih naute thuhla an simmi cu an hnenah an sim. Tuukhal pawl ih simmi thu a theitu hmuahhmuah cu an mang a bang ngaing... ti in. 

Nang le kei cun Pathian thu hi awi mei le zum mei hi harsa kan ti thei zet, ziang si maw makdanglam le finfiah nak thil pakhat khat kan hmu ta lo a si ah cun, Pathian thu hi rinhlelh nak thawn kan khat țheu, zum harsa pawm harsa kan ti țheu.

Rinum le ngawitlawm awk a thupi, hi pawl hi a mah cibai buktu dingah Zesu hin a duh a si, Pathian hmaiah milian farah thlei dan a um cuang lo. Cu ruangah nang le kei mi zawnzai te pawl khal hi a mah cibai buk dingah Zesu hin in iai lo a si. Ngaitlawm aw nun leh thin lung phah niam awte in Zesuh cibai kan buk ve kei uh le.